!! واش قرينا باش نقطعوا البحر..؟؟

أنهينا الدراسة الجامعية، وكنا دايرين فبالنا غانجحو فمدرسة الأساتذة أو على الأقل يقبلونا فمركز تكوين المعلمين

ولا يمكن يشد لينا البوليس أو الجندارم، بدينا تانطلبو غير إدارة السجون مالقيناها

كنا ميسورين والحمد لله، كل واحد فينا يمكن يوفر مبلغ من المال ونعملو شي مشروع، ولكن مدينتنا أصبحت أغلى مدينة ف إفريقيا، من جميع النواحي، العقار والمحلات التجارية أغلى من باريس

أشنو المعمول فهاد الحالة؟

حشومة ناس مجازين يخدموا فالبلدية يجمعوا الزبل، والمشكلة حتى هاد الخدمة بالواسطة أو الرشوة، ثلاثة ديال المليون د السانتيم باش تخدم زبال، وتاخد ألف وخمسمائة درهم فالشهر !!

قررنا الهجرة، ماشي على قبل الخدمة، ولكن نشوفو الناس كيف عايشة؛ كان يمكن لينا ناخدو فيزا للسياحة لإسبانيا ونمشيو بفلوسنا، ولكن اختارنا طريقة ثانية، طريقة مايقدر عليها غير شي حمق فراسو

طلعنا لبني ملال على قبل واحد السمسار مختص بأمور الهجرة السرية، شرحنا ليه الموقف، طلب منا جوج د المليون للشخص، تاوينا على راسنا ومشينا حنا ثلاثة ديال الناس ب اربعة ديال الملاين، خاص غير بنادم يكون قافز وتمشي حتى فابور

كانت الإنطلاقة من سواحل الحسيمة، والغريب في الأمر أننا مشينا ف زوارق سريعة كانت تاتهرب الحشيش

واه، كاع هذا زهر عندنا، وصلنا فزمن قياسي 45 دقيقة كنت تانعملها من الدار للكلية، عملناها من المغرب لإسبانيا

وصلنا معززين مكرمين للسواحل الإسبانية، نصحونا الناس اللي مشينا معاهوم - تجار السم - أننا نمشيو لمدينة ألميريا حيث عامرة غير بالمهاجرين السريين خصوصا أبناء البلد

واش حنا حاركين وغانمشيو لألميريا، فين جات بعد ؟ والو ديونا ليها..قالوا لينا نتوما تاتبنوا نقيين شدوا الكار وماغايهدر معاكوم حد

فعلا داك الشي اللي وقع، وصلنا للمدينة المغربية بإسباينا، وابحال إلى مشيتي لبني ملال ولا القلعة

ماكاين غير الدارجة، والكمامر المعهودة، المخير فيهم دار وراقو، ودارو مازال تايحلم يديرها

من 1984 وهو تما - هذا واحد مشا يامات الغفلة بوراق رسمية، خدام ف الفلاحة، والله ساكن فدار - براكة - فكراتني بكاريان السكويلة فين ساكن خالي

شباب الأمنية الوحيدة ديالو يرجع للمغرب، لاحقيتاش واخا يبقاو عمرهوم كامل ف إسبانيا ماغايعملو والو، باستثناء التجارة فالزطلة أو تشفر الطوموبيلات أو تبيع الفلوس المزورة باش تدير لاباس

تايدوزو النهار فالحقول الإسبانية من أجل ما يسد رمقهم وباش يلقاو فلوس الكارو وفلوس التيران فآخر الأسبوع

الكورة تابعاهوم فين مامشاو

أش دانا لهاد العالم، واش غانعملو تما، وكيف غانرجعوا، وعلاش غانرجعوا، بالنسبة لينا بحال بحال، بطالة بطالة

لكن فالمغرب على الأقل بكرامتنا، وخا تانفيقوا على الصداع والغوات ديال الوالدين، ولكن حسن مايحل عليك شي واحد من هادو فمو

تاتلقاهوم فالمغرب: gracias..mucho gracias وفبلادهوم ماكاين غير السبان وحشيان الهدرة

قررنا رجعوا بأي وسيلة، رجعوا بالطيارة أو الباخرة، ولكن داك الشي غايسبب لينا مشاكل، كيف دخلتوا وسين وجيم

رجعنا بالطريقة اللي سافرنا بيها، داونا مالين الحشيش ورجعونا مالين الحشيش، مشينا من الحسيمة ورجعنا لمارتيل

رحلة كسبوا فيها صحاب الزطلة ملايير الدراهم، وربحنا حنا فيها تجربة كبيرة حكيتها ليكم

إلى كل من يفكر في الهجرة السرية أو حتى المشروعة، إلى ماكان عندك شي دبلوم صحيح، أو شهادة كبيرة، أو ثروة أكبر، ماتفكرش تخوي البلاد، كول قشور الدلاح فالمغرب ولا ياكلوك العديان تما